S編作為其中一個90後，真係聽唔少人會問：「喂你班後生大把青春，有無咁唔捱得，少少嘢就喪到嘜咁。對未來多返少少憧憬好冇？」
有人形容1990後出世嘅人做「厭世代」，這類人有三個特質：
1. 對工作無熱情—上班等下班
2. 對未來無目標—看不到可能性
3. 對自己無信心—不知道想要甚麼
簡單來講，「厭世代」對前景、未來生活缺乏希望，只想每日唔好踩地雷，無驚無喜都冇所謂。
S編身邊有唔少朋友，特別經過呢一年香港嘅環境變化之後，對往後嘅生活一啲盼望都冇。今年畢業，又遇上武漢肺炎，簡直雪上加霜，一大盤冷水淋熄埋嗰小小火苗。S編嗰幾位朋友最後都覺得平平淡淡就算，搵份可以準時放工，準時出糧，極度穩定的工就最好了。
所以唔少人嘅理想工作係：政府工
| 厭世代與他們生活的社會
今年嘅社會運動同武漢肺炎只係其中一個原因，導致呢個社會問題其實仲有好多因素，S編整理咗其中4個大因素：
問題一：「食老本式」經濟發展
經濟產業單一，主流選擇不多，提供足夠機會發揮創意的工作更是少之又少。同時AI的盛起，都令一個問題浮面：係咪每個工作都具有價值？電子化處理會否更加便利。之後你可能再想，自己擔任的崗位是否多餘？大家可能有唔同意見，但顯然不是每個行業都有無窮的發展潛力。年輕人若在職務上苦幹，未必找到出路，即時的物質抑或精神回報亦未如理想。
問題二：資源壟斷和階級固化
上一代的少數人壟斷大部分的資源，香港人深有感悟。但唔知要慶祝定難過，每日依然有人在宣傳成功系統，嗰上升通道似乎未徹底關閉，但以年輕人的知識水平以及視野闊度（小編覺得啦有啲視野真係需要有足夠生活經驗先感悟到），多數只能都面對「我知可能有路行，但我真係唔知可以點行」嘅處境。
「厭世代」嘅父母通常來自6、70年代，正值香港起飛嘅年代，到處都係發展嘅機會，只要你願意捱，在香港不但唔會餓死你，仲可以抓住機會再上一層樓。依家香港雖然都唔會餓死你，但係唔係只要勤力，你都可以飛黃騰達呢？（真係唔係）所以與其勞碌一世，都唔知可唔可以成為中產，不如唔好追求咁多，留多啲時間俾自己享受咪仲好。
問題三：企業內主人翁精神的缺失
做茄喱啡自然沒有主角落力，人之常態。工作系統太過細化，每個人像根一模一樣，毫不特別的螺絲，日復日用同樣的節奏在原地轉動。年輕人想實現的有很多，但根本沒有相應機會發揮。最痛苦係，喺資本社會內，若追求減省成本以及控制效率，細分工作內容無可避免。年輕人好難早期就可以撼動成個體制，但最無奈係，老啲有say啲嗰陣，心境可能唔同咗。
問題四：恐懼教育的後果
先介紹兩個關鍵字：「外在動機」包括名利、薪酬、賞罰等外顯要素，時效短，需要不斷增加才能維持效果；而「內在動機」則指人的好奇心、衝動、熱情等自發元素。
恐懼教育剝奪青年對生活的支配感，生活動機只係避免責罰，避免其他人失望，缺乏自我的探索和追求。一旦父母所指示的成功正途根本未如理想，青年會感到迷茫，但又唔知自己想要咩未來，因此缺乏跳軌的堅定勇氣。
但C編同S編依然相信厭世而不棄世。做「厭世代」冇問題，關鍵在於坦白承認心態，然後尋找適切的生活模式。每個人嘅生活都為了讓自己開心，活得開心，工作就會開心。
下一篇同大家討論下，點樣擺脫厭世思想。
