「厭世代」進駐職場(三)

「厭世代」進駐職場(三)

小編同大家先做一個小重溫,有興趣可以睇返前文。「厭世代」進駐職場(一):咩叫「厭世代」?咩原因令大部分90代又多一個花名叫「厭世代」?「厭世代」進駐職場(二):要擺脫「厭世代」應該要點做?平常可以點樣做到:小改變 大改善?

去到第三篇,小編想繼續同大家分享一啲方法,協助大家慢慢改變自己嘅日常習慣。

| 1. 強化弱連結

所謂嘅弱連結其實代表你朋友圈以外嘅一層人,例如朋友的同事,社群識嘅人。强化弱連結簡單來講就係擴大人脈。呢啲人際連結可以帶來更多資源同機會。經常見到唔少因為機緣巧合下,獲得某些機會,一步一步成功。

小編同其他90後年青人一樣,大部份時間都會選擇同朋友聚會,因為大家有共同經歷同回憶,思考模式都比較相近。結果會限制自己交朋友的選擇,對於圈外嘅新事物會容易產生抗拒。

大家可能會諗弱連結對於擺脫厭世有咩作用?正正因為大家有相同嘅諗法,容易互相影響。如果你身邊都係一啲同齡,對世界好冇希望嘅人,你可以嘗試將部份時間撥去認識其他同你唔同想法嘅人,可能會帶到一啲刺激嘅思緒俾你。

| 2. 通過電影了解他人

你可能覺得識新人太麻煩,或者驚尷尬,但又想了解多啲人唔同人嘅思維或者·人生軌跡,咁點算呢?睇電影。不過,小編就推薦大家睇一啲劇情發展比較完整,人物角色刻畫比較仔細嘅電影。如果唔想太離地,都可以選擇埋一啲背景設定喺現實嘅電影。睇電影可以用最短嘅時間了解他人的人生,我哋用第三身角度觀察角色嘅經歷以及行為動機。基本上,如果電影題材取自現實,電影入面嘅角色可能就係我哋日常生活會遇到嘅人。平時我哋可能會覺得好多人好奇怪,唔知佢究竟諗緊咩,睇電影可能會俾到我哋一啲啟發。

| 3. 設定週期式目標

你試過當別人問起你有甚麼想做的事,你即刻回答:「沒有啦,我還沒有想做的事啦。」有時候,我哋未必真係無任何想做嘅事,只不過好似同目前狀態距離太遠,於是默認那只不過係一時興起嘅念頭,亦唔夠膽同其他人提起。久而久之,連行動嘅勇氣都無埋。與其要求大家無啦啦俾啲自信自己,不如實際幫大家搵個癥結所在—就係現實同夢想嘅距離太遠。好多時候,大家見到距離太遠,下一步就係直接計自己大概幾時先可以去到嗰種level,然後就覺得好似計唔到一個準確日子,咁姐係要好耐啦,咁都係算啦。老老竇竇,你咁虛無地計,距離當然好似好遠啦,邊有人可以一步登天呢?不如直接啲,先列出達成呢個目標需要嘅條件,再將呢啲條件分為唔同階段,跟住將呢啲階段拆成年計、月計以及週計的行動目標,再分配每日行程。要記住啦,我哋可能覺得自己能力欠奉,但時間都係我哋嘅資本。

| 4. 你真的是太疲累啦

最後一種,心理與生理是互相影響的。有時候先還原基本步,你可能是真的太累了。不如試下放低手頭上嘅工作,拒絕一啲其他人嘅邀約,停止腦海不斷嘅思維博弈,真係早啲訓一覺吧。如果你覺得難以即刻入睡,你可以試下冥想5-10分鐘,播放一啲白噪音,想像自己喺絕對舒服安心嘅環境,慢慢放鬆自己。

發表評論

%d 位部落客按了讚: