2020年因為疫情關係，不少打工仔都面臨減薪或者失業危機，本來仲有份工係身應該都要慶幸，但如果遇上一個無理嘅老細，你又會點睇呢？
今年一月初，係中國境內就有一份全網吐槽，爆火熱搜嘅聊天記錄，來自一位公司老闆同內部設計師，一段大大個黑人問號嘅交代工作對話。
事情的經過是這樣的：一位公司創始人，在公司的微信群向設計師員工派了一項工作：「今天出100張各種款式的小年圖，明天的早安圖50張，做出來發來群裡我們選」，要求設計師從年初一到年初八（注意八天都是公眾假期唷），每天出 100張圖，做不到就加班，直到做完為此，當設計師提出異議時，創始人仲嫌設計師話多，叫設計師應該趕緊做事。
唔知大家對於「1日內要出100張設計圖」有冇咩概念，舉幾個大家可能熟悉啲嘅例子：
- 老師對學生：今日做完100份卷，效率低係你問題，你入學時就知要做卷。
- 經理對銷售員：今日同我成交100個客戶，呢個係公司工作安排，做唔到就加班到做完為止。
- 老闆對程式員：今日寫好一個app上架，唔可以有bug，我叫你做嘅嘢要準時完成。
一枚打工仔爬完文，睇晒成篇聊天記錄，得出以下結論：
- 從年初一到初八，事主每天工作 7小時，需要完成 100張圖，即平均每 3分鐘要完成一張設計圖
- 呢 3分鐘內，事主要要諗內容（1分鐘），起稿上色或者搵素材（1分鐘），加文字（1分鐘），仲有output（哎呀已經夠鐘！都仲未做 proofreading…）
- 如果做唔完，事主點算？創始人表示：設計師能力不足，效率過低，公司安排正常，事主可以加班
雖然設計行業加班是常態，但是尊重員工是必須要的；設計係一種創作，需要構思、資訊整理、配色排版、佈局草稿、線稿等，就算係網上搵 template 搵 stock-photo 可以快好多，一日最多都係做到十幾款圖，莫講過要原創設計，甚至係神級力作，無番十日八日，都未必出到初稿。
不過講來講去，都係老細嘅死亡對話出晒事（要句句都咁刺耳都唔係一件易事）：
1. 工作需求唔清唔楚
100張圖，要咩風格，出咩內容，用途目的何在，完全唔講，只係不停叫人做做做，做一批作品出嚟俾人彈個體無完膚。其實設計師都想自己有靈魂，唔係做一個工廠流水線工人。
2. 不合理安排工作量 毫無時間規劃
就當老細真係可以百裡挑一睇得啱，咁另外 99張唔係浪費心機同時間嗎？辛苦還辛苦，但設計師都希望自己每一張作品都會受人尊重，願意自我要求去付出，但有幾多有心人會接受到無能領導的反復變更，以及自己的工作喺老細眼中一文不值。
3. 溝通方式同語氣非常差 唔尊重專業
「那是你的事」、「這裡不是收垃圾的」，有心嘅員工唔怕工作吃苦，但無人會忍受到精神上侮辱。只要換位思考，就知道工作不是賣身，就算再普通的人，都希望工作可以有丁點成就感或意義。
香港人真係對番工好盡責，工時之長可謂世界聞名，但若果面對「不可能的任務」，除咗公審老細同辭職，又係唔係冇嘢可以做呢？
新世代員工傾向「硬骨頭」，對於無法接受的任務，敢於反抗。所以奉勸各位老闆一句：「將心比己」！如果老細可以嘗試企係員工角度出發，係 work force 入面，可能就唔會多一位打工仔對工作失去熱誠喇！
