打工仔必睇/聽系列:日劇《我要準時下班》

打工仔必睇/聽系列:日劇《我要準時下班》

成日話香港人工作時數全球最長,原來香港人嘅鄉下-日本都有類似情況,佢嘅嚴重程度去到,有導演將呢個社會現象拍成劇集。有留意開日劇嘅人應該都有睇過,就係上年度播出嘅《我要準時收工》。聽個劇名都覺得好吸引,究竟主角係咪真係可以,每一日都準時收工呢?

2019年播出嘅《我要準時收工》講述:女主角因為健康問題,所以堅持每日準時收工。但因為日本傳統職場文化,令佢遇到好多挑戰。有興趣嘅話,就去睇吓套戲啦!今日一枚打工仔想分享嘅係,究竟準時收工係咪一個自私嘅行為?

以下可能係你老細,甚至你同事都會係你準時放工嘅時候,問過你嘅問題,今日一枚打工仔代你答番佢哋。睇完答案,你再諗吓你應唔應該準時收工?

| 1. 其實點解會想準時收工?

答:下,乜準時收工唔係基本嘅咩?如果唔係,點解要制定工作時間?合約就明明寫明朝9晚6,我又唔係早走,又做晒啲嘢,有問題咩?

| 2. 人人都OT,點解你可以準時?

答:因為我盡我能力,喺九個鐘頭內完成今日嘅份內事。我為咗可以準時收工,我不停提高自己嘅工作效率,我唔會拖慢啲嘢來做,所以可以準時放工。

| 3. 點解唔放多啲時間落工作,你咁冇上進心㗎?

答:有冇諗過享受生活嘅同時,其實可以識到更多嘅人,擴闊到更多嘅眼界,呢一啲經驗同經歷可以帶俾我新嘅思維同諗法。加上,我喺私人時間繼續學習新語言,或者睇書增值自己,唔通我又周圍同人講?

| 4. 淨係做自己嘅嘢,你真係一個好自私嘅人。

你好憎個個同事,就答:
若果每日都要幫其他人做埋野,係咪可以攞埋佢哋嘅人工啊?點解唔諗吓,你哋都好自私咁覺得,你哋做唔晒嘅嘢,人哋就要用私人時間同你一齊留低做?

普通同事,就答:
當有project係要一齊合作,我會同拍檔分好工,六點前完成要合作嘅部份,仲會做好自己負責嘅項目。總之宗旨係: 要參與嘅部份,一定會係放工前做完。

唔知大家睇到呢度仲會唔會覺得,準時收工係一件好自私嘅事,或者代表緊唔投入於工作?你要人哋用緊私人時間幫你做,係自私。工作時間扮公唔認真,係唔投入。但準時收工同以上所有嘢都冇抵觸。所以都係果句,你想有底氣咁同人講:我要準時收工!你就一定要遵守一件事:收工前完成你當日承諾嘅工作!咁就可以開開心心放工去食自己最鍾意嘅小籠包啦!(劇中對白)

發表評論

%d 位部落客按了讚: