職場小學問:職場新鮮人的小禁忌

職場小學問:職場新鮮人的小禁忌

每年六月又到畢業季,大批畢業生踏入社會。今年經濟環境唔好,好多人又未搵到工,又冇得去grad trip,呢兩個月應該都係不停睇招聘廣告,或者面試貼士。好彩嘅同學就可能啱啱簽約,好好好興奮。咪住先,深呼吸,各位新鮮人,你哋準備好開始漫長嘅職場生涯未?

返過Part Time 同intern都知,職場同學校好唔同。但你當時仲係學生,老細同同事都仲會當你係學下嘢攞下經驗,唔會對你咁harsh。當真正成為打工仔之後,你哋係咪又真係知道,你要點適應個行業真正標準?要改嘅小毛病有幾多?工作態度應該要點?點樣維繫同同事同上司嘅關係?一枚打工仔根據自己嘅血淚史整合了以下幾點。(越回憶越傷心~_~)

1. 唔好做trouble maker

去到職場,最大分別一定係,你唔可以再以一個想學嘢嘅心態去返工。冇人俾錢人來學嘢的(以前以為只係老細發洩下,但係真㗎)。當你仲係學生,遇到問題,你可以話俾學校聽,等老師解決。但宜家公司需要你去處理問題,唔係去製造麻煩。
Tips: 當你想同老細講呢個project有問題,你要話埋解決方法比老細聽。否則對於公司,你只係一個玩緊齊來找錯處嘅麻煩人。

2. 唔好交咗嘢就算

喺學校做學生好容易會慣咗手勢,乜都係交咗就算,冇其他嘢要跟進處理,就等professor俾Feedback同出grade。但去到返工,如果交咗就算,仲要deadline前先交,你一定會俾老細鬧到上天花板,跟住OT趕工趕到死。舉個例子,星期五前要交一份proposal俾客,你星期四晚做完就send俾老細,然後認為星期五朝頭早就可以send俾客(你實在太天真啦)。 你上面嘅動作只係done咗份嘢,但係唔算有output。

Tips: 真真正正做到嘢係要預時間俾老闆睇、自己再改,甚至後續要其他同事再跟,先可以交比客。當你確保星期五交個份達到可以send out俾客嘅水準,就係有output喇。

3. 唔好踢一踢,郁一郁

職場新鮮人多數都遇到一個問題,頭一兩個禮拜唔知自己要做啲乜。(唉)自己嘅知識經驗都未及同事,老細交俾你做嘅嘢都好瑣碎,好快做完,做完就發吽豆,發完吽豆就收工yeah。唔出奇,因爲讀書時期,多數都係老師定好要做咩,你就照跟,冇主動性可言。但真正職場非常重視主動性,無錯嘅,你可以照發吽豆扮工,但最後你呢一世都唔會學到野,老細亦都唔會想比機會你去學。

Tips: 問多兩句,留意多兩眼,唔好坐喺到等人派job,老細開聲講之前就主動問有冇嘢可以幫手,把握機會,工作上先會有所得着同成長。

點解一枚打工仔會想打呢篇嘢?因為每個人都經歷過俾老細鬧,交嘢又冇quality,唔主動問其他人,淨係識得製造問題,又唔識解決難題嘅階段。但希望呢篇文,可以分享所有我經過,我做錯過嘅嘢,咪學我,再做錯。 (改自農夫 – 偉大航道歌詞)

發表評論

%d 位部落客按了讚: