點解我日日反思都係好似無好過(上)

點解我日日反思都係好似無好過(上)

各位打工仔,返工的確辛苦。大家每日收工都可能忍唔住問:「係咪我太差,邊度出現問題,所以先會做得比其他人辛苦呢?」但係,問完之後,又點呢?或者應該問,你問過幾多次呢條問題呢?如果隔幾日,你就會問自己呢條問題,一枚打工仔覺得你可能需要檢討自己嘅反思習慣。

一枚打工仔發現人最常見嘅反思流程係:唔開心—諗邊度出現問題—睇資料/心得—發現問題—mark係planner提自己—頭幾日做到—完—有日突然醒起—唔開心—不斷循環。

要注意以下唔知大家有無出現呢個惡性循環呢?呢刻嘅你如果發現「死啦,咪講緊我。」請你唔好即刻貶低自己,因為只會再次進入新循環。希望你冷靜,嘗試諗清楚每個環節點解會發生。反思時候,你可能要注意以下幾個重點。今日先講頭三個重點。

| 不斷睇其他人嘅分析/心得文

你會唔會都有呢個習慣:一發現自己有某個問題,即刻上google同埋各大論壇search,見到其他人不斷拋出一啲高級嘅term,然後好似發現新大陸咁不斷bookmark,再bookmark。越睇越多相關文章,停唔到,最尾太眼瞓就瞓著,第二朝再睡眼惺忪咁返工。

其實呢,你記得幾多bookmark入面嘅文章重點呢?收藏太多,你根本記唔晒;掃貨咁掃,你又唔會有時間沉澱自己,思考文章意思。你不如真係jot擊中你嘅重點,將佢記熟記爛好過。

「boomark功能唔會自動連接你個腦㗎!」

| 好灰出好多post求安慰

反思令人唔開心,其實極度正常。畢竟你會由起先嘅問題,不斷延伸到其他問題,最尾發現好似成個人都充滿問題。一個人搞唔掂,一枚打工仔絕對支持你同friend傾計,但唔係以一種「係啊,我注定咁差㗎啦」嘅態度進行溝通,我估你只會收穫一堆罐頭句子,你依然繼續灰,依然唔知點樣解決問題。你不如係真係開個mindmap,搞清楚自己咩問題 ,每個問題係咪真係咁嚴重。先判斷清楚自己可唔可以自救,先斷言自己係咪注定差吧。

「自我貶低而缺乏行動叫自我放棄。」

| 不斷重播無限loop

反思過程需要重播生活細節,但如果你連人哋皺一下眉頭、加多一個助語詞都要反思半日,不斷揣測對方掂睇自己,係咪有潛意思,其實真係好攰。而人會反思多數都係令自己唔開心嘅事情,你將呢啲負面事件不斷咀嚼,好似嚼香口膠咁,嚼到粒膠發硬都繼續嚼,你只會越嚟越唔開心,姐係所謂嘅反芻思維。退一步,當你真係估中對方態度又點,呢個過程透支太多能量,你覺得你有足夠精力地plan下一步要點做咩?

「關注一啲可以我哋可以控制並推使我們向前嘅事情。」

想知道另外三個重點,就記得繼續留意下一篇文啦。

發表評論

%d 位部落客按了讚: