老細我想11點返工

老細我想11點返工

由新年到而家三個幾月,好多人都 Home Office / Take Shift 咗好長時間。隨住限聚令慢慢鬆手,唔少公司都開始「試水溫」全面復工,當然啦,為咗分散繁忙時段的交通人流,好多寫字樓都試行彈性上班時間。不過問題嚟喇!公司安排自己彈性上班,但又冇講明係幾時至幾時,咁究竟我應該幾點彈入同彈出呢?

有見及此,一枚打工仔就同另外兩位同事呀A同呀B,就住彈性上班時間呢個議題,展開咗一段激情嘅對話:

  • 同事 A:呀‧‧‧疫情就快 Game Over,冇得再叫老細俾我哋返 ShiftFlexi* 喇! (*注:Flexible Hours,即彈性上班)
  • 同事 B:你好想自己揀返工時間咩?
  • 同事 A:點解唔想呀,可以訓晏啲喎!仲要唔使返工同人迫喎!
  • 同事 B:我就不了,成日俾人問我幾點幾點喺唔喺度,好煩呀,又收唔到工,我寧願 Fix 番朝9晚6,夜晚唔好搞我
  • 我個人又唔自律,太大自由度我一定會hea。仲有fix咗朝9晚6感覺上分返開工作同生活,好似多啲私人空間。
  • 同事 A:但係番 Flexi 好自由好正喎!我嗰日想早收去做 gym 就返早啲,想朝頭早送埋女朋友返工再返嚟又得,得咗!仲多私人空間,正!
  • 同事 B:好心你個人就咪咁多幻想啦,咁易比你彈出彈入!咁我點知幾點約你開會呀!我 call會就你返晏定就我收早呀?
  • 同事 A:講到你好似返朝9就一定收晚6咁,咪又係要OT!

一枚打工仔一直都知道唔少香港公司,特別係 MNC (Multi-National Company 跨國企業),對彈性上班時間有唔同安排:有啲彈性到你 Work from Home 都得,但就要隨時應機,星期六日都要覆 Email。經常獲選為「全球最佳僱主」嘅 Google 就容許員工自己決定返幾點,得,放幾點,得,唔返公司做嘢,都得,得咗。Microsoft 就貼地啲,俾員工可以係指定時段(朝早9-11)自己揀返工時間,自己再計返指定時數收工。

其實人人最高效率嘅工作時段都唔同,有得揀一定俾冇得揀好。自己管理時間,用最高效嗰幾個鐘工作,勞動生產力提升,公司收入盈利跟住升,年尾花紅人工仲唔升?(好似扯得太遠)不過點都好,各位老細,我哋呢班打工仔都想多個選擇,你肯俾個彈性我就當然最好啦!(笑)

不過各單位都應該停一停,諗一諗先!說服老細前,打工仔都要諗清楚,你係咪想自己揀返工時間!工作內容有影響,個人性格都有影響,生活作息亦唔係人人適應到!各花入各眼,有辣有唔辣。奉勸大家三思,揀返啱自己的返工模式,先可以輕鬆做到 Work-life Harmony

發表評論

%d 位部落客按了讚: