唔知大家平時會唔會咁諗：每日都抱怨返工辛苦到嘔，但每日都係要仆去返工。用句歌詞總結就係：「活像受罪但是又離不開」。多數人都會定義工作為一定要做但根本唔想做，甚至做完更加唔開心嘅嘢。但返工係咪注定係一件痛苦嘅事呢？
| 可以如何理解自己工作。
耶魯大學的管理學教授Amy Wrzesniewski 整理咗3種對工作唔同嘅理解。
差事job：必須工作，無任何正面意義
我哋當工作係一種手段，用嚟支持工作以外嘅需求，活動或者興趣。一有錢就踢炮唔佬。
職業career：樂於工作，為了更好升遷
我哋對工作有啲理想，但個理想係喺職位、薪水等方面持續有升遷機會。無得升就過主啦。
志業calling：工作即是生活，有重大的意義
呢個其實有幾種譯法，不過多數有一種感召的意思，份工就好似個使命咁。我哋會覺得份工令自己同埋世界更加美好。無論薪金或者工時係點，我哋都樂於其中。
| 每個工作都可以變成志業
成功學大師 Stephen Covey 主張：「每個人都有機會開創自己的成功志業」
志業唔係一個固定嘅職業模板，例如要救幾個人就叫志業。佢係一種主觀感受，講緊你用咩角度理解自己工作嘅內容。
要令工作成為志業，就要持續問自己，例如我做嘅嘢幫我實踐緊咩價值，係咪符合我嘅信念。諗完自己諗埋世界，因爲有時你自己未必肯定自己要咩，咁咪睇下幫到外界啲咩，最後再扣返自己度囉。唔好見攰就停，就唔諗，跟住就話無意義㗎啦。
至於要點樣諗，你有無聽過工作形塑(Job Crafting ) 呢？
| 工作形塑(Job Crafting ) 是什麽
同一份工作，點解多於一種的評價。關鍵其實在於我哋點樣看待自己嘅職務，試下發揮創造力雕塑(craft)自己工作，賦予工作意義。
簡單舉一個醫院清潔人員嘅例子。一般都係覺得掃下地，好無聊。但其實可以唔單止掃地，打掃期間可以關懷下病人、提供多啲有用資訊，關懷下病人同埋家屬嘅感受，清潔人員都可以成為佢住院治療經驗中難忘的一部份。
例子可見，其實都係從三方面著手：任務、互動和認知，改變對工作嘅理解。
任務方面
例子入面，清潔工擴大咗自己任務的範圍，唔只清潔環境，更加係關懷病患，為病患提供額外資訊。而清潔嘅意義更加係為帶給病患更好的住院經驗。呢種思維改變，令工作變得更有意思。
互動方面
清潔工係工作期間增加咗互動對象數量，由以前單丁掃地，變成會同病人同埋家屬傾計，互動頻率從無到有。同其他人建立感情聯繫，可以令清潔工對工作投入更多感情，誘發更多感想，唔再麻木。
認知方面
一般人包括埋清潔工本身可能覺得呢份工極度無聊，缺乏價值。但工作的存在必定有其價值，與其想象自己無價值，不如設想如果世界沒有了自己，沒有了這個工種會點。要將自己看作為整個醫療系統的一環，唔好自我貶低。
最後送大家一句quote。
「有時，不是工作環境讓我們討厭，而是我們選擇用討厭的心態看待自己的工作環境。」—阿飛《開始，期待好日子》
