一個武漢肺炎（又叫COVID-19或者新冠狀病毒），令到 Zoom 成為咗全球最受歡迎的通訊軟件之一：你開會又用 Zoom，佢見客又用 Zoom，學生上堂考試用 Zoom，連 Happy Hour 都可以用 Zoom 開 Wine Party。你心諗，今次冇死喇，有咗呢個幫助千千萬萬企業、老細與打工仔的工具，就算足不出戶，都可以靠 Video Interview見工，殊不知，道高一尺，魔高一丈，咁易用嘅 Zoom，亦同時成為咗你老細炒人，叫你放無薪假嘅新手法。
今年愚人節（無錯，係愚人節，不過件事係真的）美國共享滑板車公司Bird，就以堪比自己成為獨角獸的速度，用2分鐘的Zoom Meeting炒咗406位員工。如果一枚打工仔係當中一員，一定會覺得成件事好「魔幻」：
首先，我明明知道我公司係2017年成立，用咗14個月時間，就躋身估值20億美金的獨角獸之列，刷新矽谷最快成為獨角獸的記錄，係疫情仲未席捲全球之前，2020年1月，公司仲估值緊27.7億美金，仲新融資咗7,500萬美金！
然後，係4月1號，係！係愚人節！我好乖咁根據我上星期 Accept咗嘅 Zoom Meeting，一朝早準時上線等開大會；我知道個Meeting有幾百人會參加，唔同部門同團隊都有人係度，主要係講新冠肺炎近況更新，我有睇《BBC》報導，知道Zoom視訊會議一次最多可以1,000人共同參與，所以係我眼中，所有嘢都係好正常。只係當我登入呢個單向會議後，我覺得個畫面好奇怪，見唔到公司 logo，又冇BGM (Background Music)，同最近線上開會畫面好唔同，淨係得「COVID－19」幾隻字好 lonely咁出現，氣氛相當奇怪。我突然醒起今次個大會，好似連召開會議嘅人身份係邊個都冇列出嚟交代。咁當然，我係唔會知道，原來我即將被炒，所以雖然成個畫面好匪夷所思，我都係乖乖咁等老細蒲頭。
呢個會比原定時間遲開始，等咗大約 5分鐘，都唔見老細 – Bird創始人兼CEO Travis VanderZanden。突然間，一把女聲開始讀稿，成個機械人咁讀出一段聲明：「雖然唔係最好嘅通知方法，但因為武漢肺炎，公司已經大受打擊，管理層同董事會最後決定要裁員節流。而你就係其中一個。」讀完稿，個會就突然結束咗，連畫面都冇轉過，我甚至懷疑佢只係播咗條預錄片。唔係真嘅！一定係愚人節笑話！我諗住馬上 send個電郵比我老細，同佢講呢單嘢一啲都唔好笑，點知我發現，我個 Email 同 Slack 帳戶都已經被立即停用咗。OK，我就係咁，係網上呢個炒人大會，被通知自己個飯碗冇咗。
呢單令人側目嘅「裁員案」，同傳統裁員實在太不一樣，有被裁員工直指公司以 Zoom 宣佈炒人行為懦弱不仁，所以嬲嬲地即時分享上社交媒體公審。Bird 管理層好快出面澄清，佢哋真係實時係鏡頭前宣佈，絕非利用預錄影片公佈裁員消息，純粹以聲音讀出聲明而沒有開啟畫面，係顧及員工感受嘅做法。
市道咁差，收公司大信封已經係好大打擊，仲要用咁嘅方式、空間去做呢件事，好難唔令員工嬲到震，Bird高層後來都有承認，利用Zoom通知裁員消息確實唔係好妥當。但係各州紛紛頒布禁足令，要求企業停業，無辦法要員工返回辦公室，都係迫不得已。其實唔止Bird，美國有唔少初創都係籌措資金上出現問題，OTA平台新創TripActions宣佈裁員2成，同Bird一樣都係利用Zoom同部份員工道別；另一啲冇硬性裁員嘅，亦會利用Zoom通知員工放無薪假，就好似金融科技新創Fluidly，就係會上宣佈員工可以選擇放無薪假或直接離開。
一杖打工仔就覺得，無論如何，員工對公司都付出過汗水，大家好聚好散咪算囉，咁無情又何必呢？所以不論老細定員工都要留意，喺職場，有啲情況真係唔好用 Zoom呢種 video call 遠端溝通：
- 裁員 上面講咗咁多，你應該都明啦
- 年終評核（Appraisal） 呢個環節好需要公司同員工坦誠，大家溝通下過去一年嘅表現同未來發展路向，面對面嘅溝通可以觀察到對方的表情同肢體語言，相反視像會議好容易產生距離感，令交流欠奉
- 第一次見客 除非個客主動要求（或者你係Zoom入面打工），否則親身見面先容易同客戶交流，以及觀察到對方的企業文化，有助日後繼續商談
希望疫情盡快過去，一杖打工仔可以同大家齊齊保住飯碗啦！
