返工塞住隻耳仔唔好？錯啦！外國人力資源公司Accountemps 指71%受訪者表示聽住歌做野，工作效率先會高。如果你間公司冇咁open俾你地想聽就聽，或者怕一個唔小心哼咗出聲，影響到人，不如返工前先聽下歌幫自己打氣，放咗工又用歌聲去安撫下自己，聽日又可以繼續有精神地返工喇！
| 俾啲掙扎系列 （AM）
1. 林奕匡 (Phil Lam) －一雙手
我知 一雙手 只要握成拳頭 能捱下去哪怕我 面容極蒼白 拒絕疲累/
返工唔會有老師同屋企人睇住，所有野都靠你一個人一雙手，去爭取去面對。好好活用佢地，先可以為自己換來兩餐溫飽。即使冇力氣撐住，你都要為自己的前途同將來繼續捱落去。加油！
2. RubberBand － 發現號
撞進了冰山 捲上了急灣 一秒從未想折返就望到了 就能望到了 終會踏足這峽灣/
呢一首歌可以話係經典中嘅經典，連一枚打工仔嘅老細都好鍾意聽！職場生活就好似坐喺一架船上面，不停航行又不停遇到難關。但你知你一放棄，一返轉頭，你所付出嘅一切都會化為烏有，所以你只有不停行，不停衝。你就會望到遠處嘅燈塔，可以上岸。
| 感慨成長系列（PM）
3. 許廷鏗 (Alfred Hui) － 重新長大
這世界多麼黑暗 誰獨自深深不忿人大了 成熟了 難道我能自製開心/
又到畢業季，又有一批批嘅新鮮人踏入社會。再冇校園同老師嘅護蔭，好多人都會發現現實世界嘅黑暗。面對住爾詐我虞嘅職場，只可以自己獨自唔開心／不忿，但成長路上只要遇到更多的情況，大個咗就會慢慢習慣。聽到呢到，你又想唔想長大？
4. 薛凱琪 (Fiona Sit) － 給十年後的我
你忘掉理想 只能忙於生活嗎別太遲 又十年後至想 快樂嗎/
為咗麵包而放棄愛情嘅人好多，但為咗麵包而放棄理想嘅人更多。寧願保住自己份穩定嘅工，都唔會出去闖蕩下，實現自己嘅夢想。人生有幾多個十年？
20-30歲，未有資本去闖
30-40歲，工作開始穩定，仲要計劃婚姻，
40-50歲，有埋小朋友，更如唔可以，萬一連累屋企就渣都冇得剩。
50-60歲，都準備退休啦，仲講咩理想。
但原來你的青春，精力全部花咗喺一啲唔開心嘅事上面。唔想後悔一生，就唔好被社會的主流價值觀同化，只為生計而放棄自己的夢想。趁後生，博一舖！
| 吐槽系列 （PM）
5. 農夫Fama – 偉大航道
當你正式上班 先知道乜野叫慘原來做功課好簡單 做人好難/
好多人都以為講起農夫，講起職場，一枚打工仔會推薦《日出而作》。錯！今次嘅《偉大航道》絕對會更吸引。歌詞好真實，好似有個前輩勸緊自己咁。歌詞有吐槽，有教導，不論係新鮮人定老海鮮，都會好有共鳴。
/想當你跌低過 挫敗過 有力再 去突破
路從來都係難行
但係無論幾難都好
我一定會係度陪你/
歌詞嘅第一人稱係一個過來人，佢經歷過校園生活，捱過職場歲月，最後到寫咗呢首歌。奉勸大家唔好再犯佢錯過嘅野，亦都唔好怕跌倒，爬得起就可以再去突破自己。
香港呢年發生太多事，可能今年都冇令自己開心過，但千祈唔好垂頭喪氣！香港人的歌聲，絕對可以為你帶來安慰。
