疫情再度爆發，政府部門同唔少私人企業都決定俾同事work from home。宜家等一枚打工仔推介6樣home office必備嘅小東西啦。
| 電子系列
1. 多功能轉接器
如果你屋企部laptop得一兩個USB口，又想read多幾個file，呢樣野絕對幫到你！唔使買咁多個轉接器，又可以投影去電視或者其他Mon，做雙螢幕，開video meeting一流！對於一啲屋企只有laptop嘅人真係幫到好多忙。
2. 線材收納盒/架
如果你屋企本身有好多線，唔想又再買多一個轉接器，咁你就要擁有一個收納盒或者固定架。屋企工作桌面多數比公司細，空間咁少，如果枱面仲亂七八糟，啲線繞嚟繞去，好容易倒瀉枱面杯水，等間整壞埋部電腦，今次你仲唔死？！
健康系列
3. 電腦支架
每日對住電腦九個鐘頭以上，如果部laptop好似平常咁放喺枱面。用家好容易會寒背，手腕亦都會有唔正常屈曲，好容易會影響健康。
坊間有好多唔同類型，有啲會好似變形金剛，又電腦袋變成支架。有啲就貼喺電腦背面用嘅時候先托高佢，完全唔佔空間。
4. 健康坐墊
屋企唔似辦公室，多數人都未必有一張舒服嘅辦公椅，可能只可以坐喺木凳，甚至攤係沙發做嘢。長期咁樣會姿勢唔好，都會影響骨骼健康。(老咗好易駝背)
加返一張坐墊，如果有矯正坐姿嘅功能就更好。坐得舒服，做嘢都精神爽利啲啦！
| 專注系列
5. 返工衫
Home Office好容易會懶散其中一個原因有冇諗過係因為大家嘅衣着？原來着得太舒服都會影響個人嘅精神狀態(難得work from home唔通仲着西裝喺屋企啊)
咁又唔係叫大家喺屋企都着晒成套西裝，jel 埋頭咁做，但可以換一件smart causal 嘅衫，或者著返一件西裝褸，等個精神狀態提升返，做嘢都會爽手啲！
6. 降噪耳機
唔知有冇人屋企住低層，樓下車聲人聲成日都好影響工作，閂埋窗開冷氣都係好嘈。呢個時候你就需要降噪耳機，幫你隔絕返呢啲聲音。啱晒一啲鍾意聽歌做嘢嘅人，唔怕喺屋企做嘢咁悶啦！
