打工仔ff記:返四日放三日

打工仔ff記:返四日放三日

香港人係唔係真係好鍾意返工,呢個問題真係唔知點答。成日批評啲人阻住自己返工,最好就唔好阻住自己搵食。但又會好盼望打8號風球,可以休息一日。咁即係鍾意定唔鍾意呢?(真係好難捉摸~)

但一枚打工仔相信,冇人會唔鍾意多一日假期。嘩,如果每個禮拜都多一日假期,咪發夢都識笑?想像一下,你嘅happy friday唔再只係得一個晚上,你會有半日甚至全日嘅時間,可以上興趣班,行下街。對打工仔而言真係分分鐘開心過加人工。

其實好多國家都有試過,好似紐西蘭,愛爾蘭同其他北歐國家嘅公司都有推行四天工作週。就連出名工時同香港差唔多咁長嘅日本都有大公司, 好似UNIQLO同Microsoft都跟隨步伐。佢哋發現工作效率升咗,同事請少咗假,支出好似用電、用紙都少咗。員工就當然非常之滿意啦。

香港又真係有老細行得咁前。佢地俾員工去揀,每個月兩個星期五放整日嘅假,或者每個星期五都係放半日假。咁當然啦,星期一至四就要返多幾個鐘。呢間公司都keep住推行咗半年,未來仲會繼續,睇嚟好似有得諗喎!

既然呢個話題又推翻上嚟討論,一枚打工仔決定幫大家冷靜分析埋另一面。

| 工作時數

(平時每日返工9個鐘頭) - (1個鐘食飯) = (實際工作8個鐘)
如果一個禮拜得返四日,即係你要將冇咗嘅八個鐘頭,平均分喺其他日子,咁樣你先至可以真正完成一個禮拜工作量。所以有公司就會喺嗰四日入面,加長工時去到10個鐘頭以上。嗱,各位打工仔,你係咪真係接受到又處理到,用四日完成五日嘅工作先?堅係chur堅係辛苦㗎!

| 世界繼續轉

第二個問題啦,就算你公司係推行咗,你嗰客或者你嘅vendor 都有機會都係照舊五天工作。咁其實星期五放假,你都係要覆佢哋email。當你做做下gym,個客打嚟問你野,你又冇理由唔聽喎。咁你所謂嘅放假,其實都要處理公事嘅時候,你又係咪真係可以放鬆到?原本嘅初衷,係咪又真係達到呢?仲有你啲friend呀、另一半,佢地都係要返一至五,永遠星期五可能都係得一個人享受,你又會唔會太空虛寂寞凍?

| 公平性

最後一個問題,一間公司有好多唔同部門。IT或者其他後勤部門,可能會比較容易執行呢個安排。但去到零售,或者其他要輪班嘅部門,要實行真係困難重重。當一間公司只有一啲部門先有咁嘅福利,好似同一間學校得A B班有得放多日,C D 班要照返星期五,其他人咪會覺得好唔公平囉?

以上嘅問題,除非全球各行業都統一返四日工,否則同無放無乜分別。放定唔放,這真是個好問題,一枚打工仔都未必可以答到你仲想唔想返四日。但呢個都係一個新嘗試,大改變,既然有公司願意試,一枚打工仔都好想見到有更多公司和應。因為講到尾,唔係要改變個世界啲乜,只係想職場有多啲自由同空間,俾員工多啲選擇權。

發表評論

%d 位部落客按了讚: