戒口系列-「OK啦」

戒口系列-「OK啦」

A:今日做嘢做成點呀?
B:OK啦
A:咁你攰唔攰啊?
B:OK啦
A:你老細惡唔惡?
B:OK啦

老細:咩話?

大家嘅腦袋有冇即刻諗起嘅一個人?如果有,請你立即離遠佢。如果嗰個係你,快啲戒咗佢!佢絕對影響緊你嘅職場生活。

可能你會話其實講呢句都唔係太大問題姐,個人隨和啲,接受能力高啲,要求低啲,有錯咩?仲有呢個詞語咁中性,使唔使講到咁負面啊?

咁諗實在大錯特錯,有冇發覺經常講呢句嘅同事都係好樂於安穩,負責嘅工種亦都唔太起眼,好少犯錯又好少立功,多數俗稱佢做「透明人」。

但千祈唔好諗住透明人對於身邊嘅人冇影響喎,唔聲唔聲就會影響成個團隊嘅士氣同生產力,同team killer 冇分別。

呢類透明人因為唔多覺眼,所以佢整出嚟嘅問題亦都唔會太大,咁大家就會覺得小問題,可以唔使處理。但結果到佢變成大問題,就已經太遲。

呢類員工有一種特質就係比較安於現狀,冇咗一種向上流嘅動力,覺得穩定就係福氣。當全世界都為咗目標衝刺,佢就會繼續保持現況,例如繼續發揮下限嘅水準。每日諗住Hea 下Hea下,交嘢嘅質素去到可以收貨嘅水平,就放工happy。
佢哋仲會覺得因為咁樣生活好舒服而變得一成不變甚至唔識變通,繼續用呢種水準去敷衍人。

你唔去找麻煩,但麻煩會找上你。呢類員工都一樣,以為繼續靜靜地由佢做好份內事,唔製造矛盾,就可以對團隊產生最少影響。可惜佢哋只會拉低團隊嘅水準。試想像,將一個充滿工作熱誠嘅人,同一個經常講OK啦嘅人放埋一齊,前者只會望住隊友態度敷衍,已逐漸走向後者嘅路。

最後物以類聚,一班唔識變通、低要求嘅人就會聚埋一齊,整個團隊只會停滯不前不進則退。

Oka… 好!知道!

發表評論

%d 位部落客按了讚: