唔知大家有冇試過同老細或者同同事匯報，結果講唔夠三句就俾人閘斷咗。一係就俾人鬧「所以其實你想講乜？點解我聽唔明你噏乜嘢？」
如果以上情況經常發生，咁你就要繼續睇落去。究竟你report back嘅時候，發生咗咩問題令到你老細同你溝通唔到！畢竟喺職場識得溝通嘅人如魚得水，先可以事半功倍。
| 目的
首先Report back最重要想做到嘅係：雙方對於大家嘅位置同認知係一致，令大家處於相同嘅位置起步。你諗下，你向上司報告自己得到嘅訊息、諗到嘅意見，其實就係想比老細知道事情的進展如何，再進行下一步嘅指示。
| 內容排序
當你都準備好內容，諗住入到老細房好有信心表達自己嘅時候，老細都係皺晒眉，然後中途斬斷你，再講三隻字: 講重點！
要知道report back嘅內容排序真係好影響聽嗰個人嘅感受。即刻你啲內容有幾好，你表達得差，人哋都係聽到𢲷晒頭。等一枚打工仔教你三種排序方式，快速同老細或者同事匯報，
1. 先結論再說明
一開始就要轉達你呢段說話嘅主題同結論，例如你決定落一個咩決定，而理由又係咩。千祈唔好由件事嘅起由開始同老細講，結果你講咗1分鐘都未講到其實你想做啲乜嘢決定，你話老細覺唔覺得煩啦？
2. 先講事實再講意見
首先要將兩回事分清楚，事實係陳述現狀，意見係個人想法。聽嘅人就會以事實作為根據，再判斷你嘅決定同意見可唔可行。撈嚟一齊講、或者掉轉咗嚟講，對方都會唔知道用咩基準去聽你意見。
3. 長話短說
可以用三個字解釋嘅嘢點解要用第四隻字？唔好以為講得多對方會更容易理解，事實上，講得越短，對方收到嘅訊息越清楚。將自己想表達嘅嘢縮短到1分鐘內講晒，最後再確定對方有冇其他問題想問。記住「一分鐘+Q&A」呢個定律，你就可以成為report back之鬼！
| 雙重確認
了解目的後，你就知道Report back一定要做嘅嘢係雙重確認，口頭上同書面上都要同對方做alignments。
你知啦呢幾句真係每次溝通，一有唔對就會出現:「我咪一早同你講咗囉，我咪同你confirm咗係咁樣囉？」
其實人類就係太過相信自己大腦，覺得自己一定會記得着。但點解唔將大腦用喺一啲更有用嘅時候，記憶呢啲嘢用返紙筆幫助自己。當你口頭約定完，再加上書面嘅文件，出問題嘅時候就可以立即有證據確認，究竟自己傳達失誤，定係對方記錯。
要記住report back 嘅目的係想對方同自己對現況認知一樣，有唔同仲要拗邊個先係啱，又點繼續傾落去啊？
