睇到呢個標題，相信大家都好慨嘆，因為學識拒絕係一個終身課題。唔好話職場，就算平日想拒絕朋友嘅拜托、親戚嘅好意，從來都唔係一件易事。今日要講嘅唔係點樣向你朋友say no，而喺職場，當涉及一啲責任同工作內容嘅時候，我哋應該點樣保障自己之餘，同時可以維繫到與同事、上司嘅關係呢？
一枚打工仔遇過好多例子，好似係有啲人會為咗早走，就將一啲工作卸俾同事，仲會講：我屋企人生日，你幫我一次啦，下次我會幫返你㗎！然後，就冇然後啦。傻啦，佢點會仲幫你啊，要你繼續幫佢就真，因爲佢仲有女朋友生日啦，佢朋友生日啦，佢唔知邊個遠房親戚生日啦。總之，未做晒啲嘢又想早走，咪叫你幫佢做囉。
仲有如果嗰個係你上司呢？哈！真係唔知點講好。唔通唔覆咩？之後你想準時走？哈哈，一不離二，二不離三，應承得第一次，你往後日子基本上就冇機會拒絕。
但其實咁樣繼續啞忍落去，後果可以好嚴重，唔單止工作上嘅界線越來越模糊，仲會影響心理，甚至被指派去做一啲違反職業操守同道德嘅事（橫掂你都唔識say no)）。到時，已經為時已晚。
喺同你哋分享點樣有禮貌拒絕人嘅拜托之前，大家又有冇諗過如果你係為咗面子，或者因為你唔識點開口拒絕人而要面對問題有幾多？
大家應該有聽過咩叫慣性定律，原來除咗物理學有，心理學都有一個咁定律。意思就係話，當你照單全收人哋嘅要求，應承得頭兩三次，喺人哋心目中就會成為一個習慣，覺得佢哋所有要求，你都會繼續做。繼而，只會認為你幫佢係理所當然，甚至唔會對你表達感激。
仲有，當嗰件事超出左你嘅能力範圍，但你又應承咗，最後結果你做唔到，人哋只會抹煞你所有之前嘅功勞，淨係Focus喺你做唔到嘅事情上面。最後咪變到自己攞嚟辛苦，仲要乜都得唔到俾人鬧返轉頭。唔想咁樣就睇下以下嘅小劇場，可能幫到你點樣拒絕人！
小劇場
同事: XXX，我今日要同屋企人食飯呀，份proposal呢仲差呢幾part，你幫幫手做埋，聽日前俾我呀唔該。下次你有急事我都會幫你架！
你: 我呢，其實都有幾份project跟緊，A呢份都係要聽日交，我今晚都要處理佢。始終我係PIC就要負責返，所以唔好意思我處理唔到呀。你都唔想我夾硬應承，最後兩個人都交唔到咁咪仲衰！
一枚打工仔提提你，拒絕時:
1. 先話俾佢聽今晚你有咩做，等佢唔好以為你好得閒
2. 提埋佢，PIC就要負責返所有嘢，唔好交個波俾人。
拒絕絕對唔係一件自私嘅行為，只係想保障自己，保障對方。要記住你應承之後，責任從來都係對方到，你只係一個幫手。更何況你冇任何義務去做呢件事，當然你可以為咗友情、或者關係，甚至係自己嘅面子而去答應。但如果能力或者時間唔許可，千祈唔好勉強，仲要分清楚邊一啲係吃力不討好嘅事。學識適當嘅拒絕，係對自己嘅一份尊重同認同。
