唔知有冇人好怕係Office多謝人，因為覺得多此一舉。大家收得人工做嘢，幫下手就係份內事。費事講多錯多，結果無係過Office講聲多謝。
但其實一句多謝可以係一個好大嘅鼓勵，你的態度都會影響他人的態度。人地無收到你句多謝，可能自此唔願意同其他人講多謝。
| 點解唔講？
其實唔講Thank you嘅原因大多數都係怕人誤會。可能同左其中一個同事講，但又冇同另外一個同事講，驚令到其他人唔高興。或者本身關係唔係好close，突然爆一句Thank you，驚其他人會諗：自己係咪另有企圖。腦部大戰完一輪後都係決定唔講啦。
仲有一個原因係關於對老細講多謝，其他人會覺得你擦鞋。辦公室世界非常之複雜，本來只係表達感謝嘅一句，可能其他人冇講，而自己講咗就俾人排斥。只係簡單一句thank you，因為對象係老細，就等於擦鞋博上位。費事無事獻殷勤，最後都選擇沉默。
但明明係一個鼓勵、感激嘅說話，點解要背後諗咁多。其實不論對上司定係同事只要講得恰到好處，就冇問題！
| 對上司-要具體
先假設每一個向上司講多謝嘅人都係好誠懇，唔係諗住博上位去講。咁點樣講先可以撇除擦鞋嘅嫌疑呢？關鍵在於有冇具體地講清楚點解要多謝。
例如：
你比客鬧你提出嘅方案唔夠好，唔適合，上司就幫手講好說話，讚你其他地方做得好，幫你打好同客嘅關係，順利做到生意。你對以上嘅行為非常之感激，覺得上司真係是有心栽培自己，所以想多謝上司。
呢個時候千祈唔好長篇大論，用幾句解釋事件，再加一句多謝就足夠。唔需要買禮物，唔需要做過多嘅嘢，越簡短越好。具體俾老細知你好感激佢對你嘅好，點到即止就唔怕人地嘅閒言閒語！
| 對同事-要個人化
同同事講多謝，不外乎都係想同佢打好關係。上面都講到大家會覺得一齊為公司做嘢都係份內事，多謝其實唔講多謝都得。但有冇諗過，你應該具體針對特定事件講多謝。
例如：
其中一個同事用自己嘅人脈，幫你氹番掂個客，等你唔會得失個客。
你要多謝嘅位唔係佢令公司唔會失去呢一單生意，而係關於你自己。佢嘅行為令你唔會俾人鬧。你要講到呢件事佢唔係必須要做，但都願意幫手真係幫咗自己好多。同上面一樣唔一定需要禮物，簡單一句WhatsApp message或者一張memo紙去講多謝，其實都deliver到個message。
人越大越吝嗇去講任何一句說話，試吓簡單啲去睇每一個同事所講嘅多謝，可能冇你想像中咁多心機。
