To 老細系列:幾時先到我升職?

To 老細系列:幾時先到我升職?

同老細講想升職,就好似叫你女朋友唔好遲到一樣,一定諸多藉口。不過呢,就算升到職都唔一定係好嘢,有老細係升你職呀,但唔會加你人工,但就不斷加重你嘅工作量,話要更加稱合你嘅職位。係咪更加似女朋友應承你唔遲到,但要你由大西北去港島接佢出門口,一樣道理?

一枚打工仔想分享個案,話說之前有一個朋友不停鬧佢老細:
 
大佬呀,我都叫為間公司仆心仆命呀,要我OT,OK我留!要我發燒都趕起份proposal,OK我做!人工同工作量都唔啱比例,大大話話做咗3年,一直就等你升我職。但你一句覺得我唔值,就搵咗個外人坐個經理位,咩吸收多啲外面的經驗喎。我真係火都嚟埋,我咁多年嘅付出,原來對你嚟講係冇價值,人地經驗係經驗,我嘅經驗就唔係經驗嚟嘅。

一直以來,大部分行業都冇一個平均升職年數。雖然JobsDB喺2017年公佈嘅職位晉升調查報告有提到香港打工仔一般需要等2.92年先有得升職,但一枚打工仔都聽過有人可以用一年,由Officer(主任)晉升至Manager(經理),亦有人做咗11年「開荒牛」都仲係同一個位。所以話冇野係絕對嘅。(你估你想升就有得升?)
JobsDB份報告仲有講到,原來打工仔同老細認為嘅升職要求係唔一樣㗎。打工仔心目中有3個主要因素決定升職速度,除咗要工作表現好,仲要得上司鍾意同有運氣,先會升得快。但其實一般僱主就覺得表現突出同領導能力先係最決定性嘅因素。

兩者心目中嘅準則唔同,所以就會發生上面朋友分享嘅經歷。同一份調查仲反映到香港嘅打工仔,不論有冇得升,其實對個制度都冇信心,覺得成件事唔公平、唔客觀。上司想升邊個就升邊個,冇一套系統化嘅晉升機制,咁咪令到雙方企喺對立面。

其實工作咗一定年數,有時都會諗自己嘅能力又去到邊個level,如果冇得升職又係唔係代表自己真係冇價值?呢度大家可以先諗下:升職喺你心目中代表緊咩?有得升職對你來講又係咩意義?

對某啲人嚟講,可能係對於多年付出嘅一種補償,起碼打咗呢份工咁多年,點都升返一兩級啦。而另一類人就會覺得,其實喺職場上都想自己有成長,有得著,升職就係其中一種能力嘅肯定。呢類人相信只要不停增值自己嘅知識,累積自己嘅經驗,當能力去到某一個程度,就可以勝任更高職位,完成更難嘅工作。

一枚打工仔喺香港土生土長,又點會唔知香港係一個用你嘅職位高低評價你嘅社會地位嘅地方呢。人生漫漫長路,有人嬴在起跑線,有人又會慢慢跑到終點。而職場生活佔咗人生差唔多3分之2時間,如果發現自己的工作得唔到尊重,不如就試下轉個新環境,去搵一個係願意欣賞你嘅付出嘅公司啦!

發表評論

%d 位部落客按了讚: