話說有一日，一枚打工仔放咗工同朋友講起Home office……
一枚打工仔： 我想問下你哋，home office 呢…· 朋友 A： 點啊又講home office ，悶唔悶啲啊，又係咩幾個好處幾個壞處呢啲呀？
一枚打工仔： 冷靜啲，點會仲係講緊嗰幾樣野啊，我想問wfh嘅時候你哋有冇遇過啲咩問題？例如…
朋友 B： 我講先我講先！我覺得home office最煩係老細成日都覺得我偷緊懶，係咁check我有無做嘢，check得密過喺office。
朋友 A： 我都試過啊！痴線，九點鐘準時打嚟囉，諗住睇吓我係咪準備開工喎。
朋友 B： 咪係囉！以為我係好似行山銀行個6個MT咩！
一枚打工仔： 哈哈……咁除咗呢個問題呢，仲…
朋友 A： 仲有啊，喺屋企啲人以為我唔使做，一時叫我落街幫佢買嘢，一時又叫我幫佢做家務。
朋友 B： 啱呀，已經好多嘢要搞㗎啦，仲係咁嘈，我唔知同我媽鬧咗幾多次交。
· 一枚打工仔： 我想講個問題係，你哋有冇做嘢慢咗啊？
朋友 A： 老實講…其實真係有！喺屋企呢，冇個環境逼着，冇乜動力做。
朋友 B： 我都有！有時會拖長咗啲嘢來做，平時逼住6點想放工，效率不知幾高。而家橫掂都係屋 企，反而可能八九點先做完嘢！ Home Office要求高自律性，如果好似兩個朋友咁，得閒又同屋企隻主子傾吓計，間中又睇吓Facebook IG，食飯又可以食兩個鐘，一路煲劇一路慢慢做都仲得！結果，效率咪比以前低勁多！唉，喺屋企做嘢真係好多誘惑，唔好彩張床喺正你書枱隔離嘅話，隨時瞓埋晏覺，又冇多兩個鐘啦！
雖然一開始講嘅問題好似好難搞，但效率呢家野，你下定決心的話，要提升就唔難嘅。等一枚打工仔俾3個小帖士俾你啦！（雖然我有時都會比其他吸引走注意力-.-）
1. 技術支援
所謂工欲善其事必先利其器，喺屋企做嘢，經常要用到電腦，IT support就真係好重要。所以記住每一日都要準備強勁嘅Wi-Fi，同埋常用嘅視像通訊軟件，好似zoom或者Skype(唔好咁懶，account都唔開，用訪客)。你知啦，開開下會突然之間上唔到網，就好樣衰架嘛，留個壞印象俾老細就唔好喇！
2. 通知屋企人
上面同事都提過屋企人呢個尷尬位。雖然家家有本難念的經，但溝通好就一定冇死。一枚打工仔試過貼張紙喺門口，寫住請勿打擾、幾多點後先好入嚟，咁就唔會有屋企人突然沖入嚟，叫你做家務喇！
3. 時間管理
仲有一個最大嘅敵人，就係自己！home office 真係好容易攤落張床睇吓YouTube，嘥晒啲時間，結果要用比平時多兩至三個鐘，先完成一日嘅工作。一枚打工仔都知，要喺屋企堅持朝九晚五嘅時間表都冇咩可能，所以最少都要為自己每一項工作set個時限。記得唔好拖長來做，咁就唔怕做到八九點都未完成喇。
有拖延症嘅人實在太多(包括一枚打工仔)，唔係全部人都可以好自律跟足時間表去做嘢，所以又想work from home又唔想做到半夜三更，就試下上面嘅方法啦。如果你哋有更好嘅提議，都可以留言share俾大家㗎！
