好多人反思完都係覺得現況無改善到，甚至越反思越痛苦，所以覺得反思根本就無用。但其實好多時候，只係大家反思形式唔到位。我哋最要明白，自我反省嘅核心目標，係透過有效地提升自己，唔係，而唔係自我安慰。
上一篇文章(【打工仔想講幾句 】點解我日日反思都係好似無好過（上）)提到一般人最常見嘅反思流程係：
唔開心 –> 諗邊度出現問題—睇資料/心得 –> 發現問題 –> mark係planner提自己 –> 頭幾日做到 –> 完 –> 有日突然醒起 –> 唔開心–> 不斷循環。
上一篇主要分析反思初期常見嘅問題，今日講嘅3個重點就會圍繞之後行動嘅部分。
| 4. 不斷拖延擇日繼續
一枚打工仔都明返工真係好辛苦， 一收工只想訓覺，放假就想瘋狂娛樂，其他嘢唔好煩我啦。反思要消耗好多心力，收工要騰出時間做呢樣嘢真係好痛苦，但問題一日存在，佢依然會影響你嘅工作同埋生活，刺下刺下，個洞越嚟越深。你就算迴避，表面好似好開心，若無其事，但你根本唔滿意現狀，唔會真係可以自在地、輕鬆咁玩。即使辛苦，都要踏出第一步。好啦，決定要行動，但請你寫好計劃，加埋planb，例如遇到突發事件，個plan要點調整。相信小編，如果你唔寫定，到時schedule一變，甩track，你就會變返原狀。
「除非你願意並成功催眠自己現況好正常，否則你遲早會爆。」
| 5️. 你做好晒報告，清單超整齊
Okay，你好勁，respect。不過你可以試下唔只檢討過去，視野唔好放喺依家有無完成某個task咁簡單，而係將現況同未來做比較，例如如果我想幾歲完成邊個goal，宜家嘅我去到幾分之幾呢，繼續呢個節奏係咪真係可以準時完成目標呢。多問自己你想擁有點樣嘅人生？你人生嘅目的係點樣？唔好只係興奮於當刻的達標，人生嘅追求唔只合格與否。
「宜家生活有無見到你理想人生嘅可能性？」
| 6️. 你信念超級堅定
啲人成日話回歸初心，咁你可唔可以答到點解你有呢個信念呢？聽落好無聊，但時間一耐，人好易因為習慣而繼續行動，而唔係因為堅信某個信念而繼續行動。你問自己係咪仲記得「點解會有嗰個信念？」，「點理解嗰個信念？」，「行動係咪真係符合嗰個信念？」，「有無其他新信念/追求？」。你越相信，越重視嘅信念，你越要多懷疑。雖然話唔係有人批評，就代表你出現問題，但試下唔好即刻否定其他人嘅意見，真係思考下對方嘅意見係咪有可取之處。
「行到咁上下，都要回頭記返自己的初衷！」
講到尾，反思需要思考與行動結合，興奮與痛苦並存，如果缺乏任何一點，或者出現失衡，你都應該檢討下自己嘅反思習慣。
如何改善反思習慣
| 學習寫日記
反思需要實例進行分析。多數人只依賴自己的記憶，腦海裏天人交戰三百回合，到頭來連事件細節係咪真實都無法分辨。你嘅記憶力遠比你想象差，與其臨時絞盡腦汁，不如平時就做好記錄啦。你可能間中都會開下備忘錄，記錄下靈感，但一係零散，一係太流水賬，無重點。一枚打工仔建議你下載一些電子筆記程式，培養下寫每日記錄嘅習慣，將日記分好唔同板塊，每篇文章標嘅標題寫清楚關鍵詞。你未必有時間不斷反思，可能隔幾個禮拜，或者月計，翻看分好類嘅日記，你會更容易記得當時發生咩事，同埋集中真係要重點反思嘅部分。
| 閱讀書籍
反思遇到瓶頸，思考極都唔明，與其鑽牛角尖，不如睇多幾本書。睇書唔係叫你隨便睇，睇各行偉人嘅點樣思考問題，點解決問題。通過睇書跟隨巨人嘅思路，掌握多種思維模型，重塑自己嘅思維模式。除了睇同行領軍者嘅思維模型，可以睇埋其他行業偉人嘅思路，你可能會有唔同嘅發現。
| 制定並開始你的行動
上述都只係協助你發現問題。但發現問題只係前期工序，你要真係行動。行動先可以檢驗究竟想法係咪真係有效，需唔需要調整。而制定行動計劃，大家經常忽視呢個步驟：思考planb。首先，你要好仔細地寫每日行動計劃，可能以小時為單位，時間要控制得好精確，先可以確保自己無甩track。你要同時思考，萬一某個時段出現變數，可以點樣補償返或者點樣調整個時間表，唔好一有變動就不斷延期，延到2046。
