摘要
打開嗰飯盒全部都係螞蟻，想像都覺得可怕。
食個飯姐，俾人抖下好無，大佬啊。
老實講，平時返工辛苦都算，
有啲同事可唔可以俾啲自覺，
唔好咁污糟邋遢，見到真係好礙眼，
係咪想我當面開片呢？
網絡熱話：母親的愛心螞蟻飯盒
香港YouTuber Zain 近日在Instagram上發佈<<我的母毒飯盒>> 、<<最後母士>>兩篇貼文，分享同事連續兩日嗰飯盒都係成兜螞蟻嘅悲慘故事。同事向母親投訴，反而收到「螞蟻無毒，洗下再食」「媽咪唔會害你」等恢復，真係欲哭無淚。成段對話非常搞笑，有興趣可以去原post睇返。
精彩對白節錄
你放心，媽咪唔會害你㗎。
你開心啲，媽咪教你嘅嘢要聽，要肯吸收。
嗰位同事相當剋仔，好彩最後無病無痛。但飯盒污糟唔只食壞自己嗰肚，仲會嚇親隔離同事，以為你無衛生常識。當然呢次飯盒事件同嗰位同事無關，但辦公室污糟邋遢嘅人真係超乎想像。
第一類人：長期檯面超多餛飩 積喺度唔扔
其實筆者都有鼻敏感，呢種痛苦我明嘅，但唔好意思，無發作嘅時候見到隔離位成檯餛飩，筆者都忍唔到皺晒眉頭，咁你明啦。體諒，所以其他人無當面鬧囉，但你起碼俾多少少行動，搵個袋裝住又好，定期清一輪又好，起碼唔好就咁攤晒喺度。
老實講，辦公室啲紙巾厚度多數有限，你試想像啲分泌物要透唔透咁，你又接唔接受到呢？
討厭指數：✩✩✩✩
第二類人：飯盒餐具永遠擺係度 等唔知邊日姐姐去洗
筆者公司每嗰禮拜都會有清潔姐姐嚟打掃同埋洗碗，於是有啲同事就會計好日子，將啲飯盒或者餐具放喺度，等啲姐姐去洗。筆者唔清楚呢啲係咪叫善用公司資源，但真係好好奇，洗個飯盒咪倒、沖、捽、抹幾步，有無咁困難啊？一日都還好，有時嗰同事係放假，嗰杯擺係度就幾日。大佬，有啲仲要沖過咖啡嗰類甜嘢，惹蟻㗎，係咪想上演螞蟻飯盒事件？
討厭指數：✩✩✩ （因為唔洗我洗，哈哈）
第三類人：瘋狂咳嗽打噴嚏 唔戴返口罩唔去洗手
同第一類人有些少類似，呢類人就唔係恆常有嘅，但就係突然來超多個噴嚏或者咳嗽，你知啦，非常時期個個都好敏感㗎嘛，其他同事當然即刻睥住佢，嗰位同事即刻否認自己無中招，以為平軍心。你有無中招我哋都估唔到，問題係，你起碼即可消毒或者洗手，帶返嗰口罩嘛，大搖大擺咁，點同你再接觸，好驚㗎嘛。最弊係，你叫佢洗手，話佢污糟，佢即刻唔開心。都係嗰句，非常時期，俾啲自覺啦。
討厭指數：✩✩✩✩
第四類人：喺度不斷撩鼻撩耳仔 小動作永遠改唔甩
其實佢哋未必真係深入地撩緊耳屎或者鼻屎，但佢哋真係好慣性將手指係嗰鼻頭或者耳道門口，旁觀者好容易誤會你真係係度撩緊。撩下撩下，自己都未必留意，就真係撩埋入去。唔好意思，講得太過仔細，因為筆者試過。呢度同各位同事講聲唔好意思。隔離見到，其實觀感真係好差。
討厭指數：✩✩✩（唔好掂我就可以了）
第五類人：借完人嘢好多手汗 又永遠都唔會抹
都係嗰句，理解大家體質唔同，筆者都係手汗多嗰類人，但唔好咩都要人體諒。筆者自己流汗或者出手汗時候，都會好小心，如果要掂人哋啲嘢，例如借用電話，借筆嗰類，筆者會先抹汗，用完check有無汗跡，再抹一次。你知，有時同事出於禮貌，唔係你面前抹，但用上手真係覺得好唔自在。無謂要人難為，自己抹好先啦，好無。
討厭指數：✩✩✩✩✩（筆者唔鍾意接觸體液）
第六類人：對住你放屁或者打嗝 直中面門
唔熟真係唔好咁做，重申n次！有時，有啲同事無聊會玩呢啲屁梗，笑又唔係，嬲又唔係，唔知點反應。有時如果嗰屁係臭，真係想即刻鬧人。至於唔小心放屁嗰啲，人之常情，筆者當然就唔會批評。
討厭指數：✩✩✩（+✩✩✩ 如果係臭屁）
第七類人：不斷食零食 碎屑跌到周圍都係
辦公室大壓力或者無聊時想食零食，好正常，但請注意公德心，唔好食到周圍都係。螞蟻、蟑螂呢啲奇珍異獸就係咁吸引返嚟。請用紙巾、膠袋、碗碟托住，避免碎屑跌落地面，辦公室如果有鋪地毯，其實好難掃得乾淨。同埋食完之後，唔該夾好，暴露係空氣中，一來好易壞，一來惹蟑螂嗰類小動物。請保持清潔。
討厭指數：✩✩✩
【延伸閱讀】3套石原里美主演職場劇看女性職場之路 | 經典劇集金句分享
【延伸閱讀】瘋狂的打工仔半澤直樹？夠假也夠真！
【延伸閱讀】進入心流體驗 突破人體極限
